Hordaland fylkeskommune står bak satsinga Kulturelt utviklingsprogram (KUP). KUP skal ”vere ei fleksibel reiskap som skal avgrense og målrette innsatsen innanfor fylkeskommunen sine strategiar”, og ”gje grunnlag for spleiselag og krefter til tyngre løft.”

I perioden 2010-2011 har desse innsatsområda vore prioriterte: Kunstnarleg nyskaping,   samarbeid , nyskapande formidling  og kompetanse. Kultur- og ressursutvalet delte i går ut seks millionar KUP-kroner til 16 prosjekt, der dei største summane gjekk til forprosjektet til hardingfelesenteret i Hardanger,  Olav H. Hauge-senter i Ulvik, utvikling av Kunstnarhuset Messen, folkeoperaprosjektet ”Havhest” og Vestnorsk filmsenter.

Det sistnemde prosjektet, ”Kjøl”, fekk den største delen av KUP-potten, og mottok 1, 4 millionar kroner. 

Forprosjektet til hardingfelesenteret fekk på si side 425 000. Det er som kjend Hardanger og Voss museum som står bak dette initiativet.

– Målet med støtta er å gje hardingfelemiljøet gode vektsvilkår, auka interesse og forståing for hardingfela og folkemusikken lokalt, regionalt og nasjonalt, samt bringe hardingfele ut i verda til eit stort publikum, seier Helge Andre Njåstad, som er utvalsleiar i KUP.

Njåstad seier seg glad for at Hordaland fylkeskommune kan stimulere kulturlivet i Hordaland, og omtalar KUP  som storsatsinga til kultur- og ressursutvalet.

Om det store filmprosjektet ”Kjøl” kan han fortele dette:

- Vi har valt å satse sterkt på utviklinga av film gjennom samarbeid mellom Vestnorsk filmsenter, museum, bibliotek og kultursentre. Prosjektet  ”Kjøl” skal starte med ein konferanse som skal munne ut i konkrete filmprosjekt. ”Kjøl”skal også satse på digital distribusjon og nettbasert filmteneste, som skal kunne nyttast av museum, kultursentre, skular og bibliotek.

Olav H. Hauge-senteret i Ulvik får den neststørste bevillinga.

– Vi har løyvt 850.000 kroner til ei basisutstilling/nettutstilling ved senteret. Dette blir den første i landet om lyrikk i alle sine former, norsk og utanlandsk. Utstillinga skal presentere Olav H. Hauges liv og verk, avsluttar Njåstad.

Den komplette lista over løyvinga av KUP-midlar finn du her. Relaterte artiklar står som vanleg øverst til venstre på denne sida.