Innspel og ordskiftet etter landskappleiken 2009 har aktualisert eit behov for å gå svært nøye inn på kva vi meiner er ”folkesong” og kva stiltrekk og uttrykk som skal tilleggjast vekt i dømming på kappleik. Seminaret 21. februar vert det fyrste av to seminar, særleg retta mot utøvarar, kappleiksrekruttar og dei som har vore / vil vera kappleiksdommarar, og elles alle interesserte.

SEMINAR 1 skal ha fokus på stil, stilkjensle, dei ulike sjangrane og geografiske særtrekk og variasjonar og har som mål å klargjera korleis vi set ord på det vi framfører og kva som kjenneteiknar stil og uttrykk i kveding/folkesongen.

  • Gunnlaug Lien Myhr, utøvar og medlem i gruppa som utarbeidde dommarskjemaet, orienterer om terminologien i skjemaet og tankane om bruken.
     
  • Gunn Gausemel, tilsett i folkemusikkavdelinga i NRK, presenterer døme frå kappleiksopptak for lytting og samtale.
     
  • Ingrid Gjertsen, leiar for Arne Bjørndalsamlinga, Universitetet i Bergen, har eit musikkfagleg innlegg om stil og uttrykk i folkesongen.


SEMINAR 2 i mai/juni går direkte på folkesongen på kappleikarenaen og tek for seg formidlingssituasjonen, dømming, reglement og dommarskjemaet som arbeidsreiskap. Spørsmålet om grenseoppgangen mellom det som er / ikkje er tradisjonell folkeleg dyrka song har vore emne for mange seminar, men er tilbakevendande og aktuelt for stadig nye grupper.  Det er derfor viktig at det på nytt er sett på dagsorden.

Norsk kvedarforum takkar FolkOrg for initiativet og vonar at særleg mange utøvarar er med på seminaret og bidreg til å klargjera det viktige spørsmålet om musikalske og kunstnarlege uttrykk i folkesongen vår. Vel møtt til spennande kvedarkveld og eit viktig seminar
 

PROGRAM


Dato:  Sundag 21. februar
Tid:     12 – 17
Stad:  Oslo, hjå Folkemusikk- og Folkedansorganisasjonen
 
 

12.00    Opning av seminaret
12.10 Gunnlaug Lien Myhr: Om dommarskjemaet på kappleik.
Terminologien i skjemaet og retningslinene om bruken.
12.40 Debatt
13.00 Kaffe
13.15

Gunn Gausemel presenterer eksempel frå kappleiksopptak i NRK.
Gjennom lytting og samtale i grupper går vi inn på ordbruk og
seiemåtar vi brukar om det vi høyrer.Deretter drøftar vi mellom anna desse spørsmåla:


Klarer vi å uttrykkje med ord det vi høyrer ?
Treng vi å klargjera omgrep og uttrykk for å få ei felles forståing ?
Kva er det som er viktig og typisk i folkesongen ?    
14.30 Mat
15.00 Oppsummering av gruppearbeidet
15.45 Kaffe
16.00 Ingrid Gjertsen: Ulike stiltrekk i folkesongen
16.30 Debatt
17.00 Oppsummering. Avslutning     Vi inviterer utøvarar, folkesongelevar og -lærarar og alle interesserte til eit spennande seminar.


PÅMELDING

Meld fra til Folkemusikk og folkedansorganisasjonen innan torsdag 18 februar.
E-post: post@folkemusikk.no  eller tlf  22 00 56 90

Seminaret er gratis.

Arrangør
FolkOrg i samarbeid med Kvedarforum