Flott mottaking i Glasgow

Valkyrien Allstars, Gjermund Larsen trio, Synnøve S. Bjørset, Skaidi, Unni Boksasp ensemble, og Majorstuen, som alle vert presenterte under paraplyen "Spotlight Norway", spela for fulle hus på ulike scener i Glasgow i samband med den velrenommerte festivalen Celtic Connections. Det norske programmet romma konsertar, liveopptak på BBC Radio 3, seminar, plateslepp, mottaking og jam-sessions på festivalklubben.

Glasgow Royal Concert Hall er hovudsetet for Celtic Connections med aktivitet i alle tilgjengelege lokal. Alt frå seminar og mottakingar i foajeane til konsertar med verdsstjerner i Main Auditorium og The Strathclyde Suite. I tillegg spreier festivalen seg over 14 ulike scener i byen.

To norske artistar stod på plakaten fredag kveld. Unni Boksasp Ensemble presenterte tradisjonelle songar frå Nordmøre i nye arrangement. Nokre kvartal unna, i attenhundretalskyrkja St.Andrew's in the Square, framførte Synnøve S. Bjørset hardingfeleslåttar hovudsakleg frå Sunnfjord, Sogn og Valdres.

Dagen etter inneheldt festivalprogrammet heile tre norske konsertar på ulike scener. Majorstuen møtte eit begeistra publikum i Stathclyde Suite med nylaga komposisjonar og samkøyrt felespel. Likeins rocka Valkyrien Allstars opp ærverdige ABC med godt og vel 700 tilskodarar i salen. Ikkje fult så høglydt, men lang frå lågmælt, inviterte Skaidi folket i St.Andrew's in the Square inn i si grensesprengjande musikalske energiverd av joik og jazz. Celtic Connections sin avslutningskonsert med Gjermund Larsen trio sette eit verdig punktum for Spotlight Norway-programmet i Old Fruitmarket - ein gamal fruktmarknad som i dag må vere Glasgow si mest imponerande konsertscene. 1600 tilskodarar og raus takhøgde sette ei flott ramme omkring Larsen si skatteskiste av gode komposisjonar.

I tillegg til desse konsertane spela alle artistane på festivalklubben, eit uformelt clubkonsept der opptil 12 grupper og artistar opptredde kvar kveld. Delegatar, fans og musikarar strøymde til Glasgow Arts School der festivalklubben fann stad, og musikken stilna sjalden før kl kl 04.

I tillegg til å vere artistar på Celtic Connections var dei norske artistane også ein del av Showcase Scotland; eit internasjonalt musikkbransjetreff der delegatar frå 19 ulike land deltok. For musikarane kan dette vere eit viktig springbrett til ei internasjonal musikkarriere. Tala som Showcase Scotland sjølv presenterer, syner ei suksesshistorie der musikarane i etterkant teiknar platekontraktar, får kontakt med agentar og signerer turné-og konsertkontrakter.

Heile 24 representantar frå norsk musikkbransje var til stades på Showcase Scotland i år.