I Fureprisfinalen under Landskappleiken på Røros laurdag var fem folkemusikarar under 25 år med å kjempe om prisen. På scena stod Erlend Apneseth (hardingfele), Hans Kjorstad (fele), Tor Hoslemo (hardingfele), Mari Midtli (vokal) og Ida Furusæter (durspel). Til slutt falt juryen sitt val på hardingfelespelaren Erlend Apneseth. Prisen vart delt ut under meisterkonserten i Verket på Røros sundag.
 |
| Erlend Apnseth under meisterkonserten på Røros. Foto: Knut Utler |
Finalespel i a-klassa
Erlend Apneseth har hatt ei imponerande utvikling. Under Lanskappleiken på Røros var han ein av tre som spelte finalespel i a-klassa for hardingfele, og kom til slutt på tredje plass. Apneseth har gått rett opp a-klassa i hardingfele på kortast mogleg tid. I 2012 vann han òg plateselskapet Grappas debutantpris, og til hausten kjem debutalbumet. Han er også månadens artist på Riksscenen i oktober.
Hovuddommar for Fureprisen i år var Berit Opheim som høyrde heile 93 utøvarar under 25 år på Landskappleiken. Meddommarane var Eli Storbekken (vokal folkemusikk), Sjur Viken (spel fele), Herbjørn Liahagen (spel hardingfele), Ailin Kristine Mørkve (durspel) og Arnt Magne Haugen (eldre folkemusikkinstrument).
 |
| Rasmus Kjorstad var ein av dei fire som mottok Furestipendet på 10 000,-. Foto: Knut Utler. |
Fire Furestipend
I tillegg til hovudprisen på 50 000,- vert det også delt ut 10.000 kroner i stipend til vinnarane av C-klassane, dersom domarane meiner dei gjer det særskilt godt eller syner spesielle talent. For musikarar og kvedarar er det Furestiftinga som gjev hovudprisen og stipenda. FolkOrg set sjølv opp premiar på same vilkår for C-klassane i dans. I år fekk desse fire stipend:
Durspel junior: Amund Grytting, Harpefoss spel – og dansarlag
Spel hardingfele C: Helga Myhr, Ål spel – og dansarlag
Vokal C: Mari Midtli, Sel og Otta spel – og dansarlag
Spel fele C: Rasmus Kjorstad, Harpefoss spel – og dansarlag
I år vart ingen som mottak FolkOrgstipendet.
Om Fureprisen
Fureprisen går til ein deltakar på Landskappleiken under 25 år uansett klasse , og er på 50 000,-. Prisen er gjeven av Furestiftinga, ei stifting etter forretningsmannen Knut Fure og kona. Avkastninga frå fondet skal gå til støtte for klassisk musikk og norsk tradisjonsmusikk. Førebels vert siste gong prisane vert utdelte under Landskappleiken på Geilo til neste år.
Tidlegare vinnarar av Fureprisen:
2010: Ingebjørg Harman Bratland (Vokal A) frå Vinje i Telemark.
2011: Bjørn Kåre Bråten Odde (Fele A) frå Lom i Gudbrandsdalen.
2012: Jørgen Nyrønning (Fele A) frå Ålen i Sør-Trøndelag