Hardingfelespelarane Knut Hamre og Benedicte Maurseth kom då ut med CD´en ”Rosa i botnen”. Her gjekk dei nye og gamle veger ved å ta i bruk dei eldste eksisterande hardingfelene i verda, satte på tarmstrenger og bruka korte barokkbogar. Dette revitaliserte gamle instrument og slåttemusikk inn i eit nytt musikalsk liv. Nå har duoen invitert komponist Nils Økland til å skriva eit nytt stykke for dei. Då dei gamle hardingfelene og den eldste slåttemusikken har sterke koplingar til vest-europeisk musikk på 16- og 1700- tallet, har dei saman invitert med andre barokkmusikarar.
Komponist Nils Økland har sagt om verket: "Det er ei stor og spennande utfordring å skriva for "Rosa i Botnen Ensemblet". Denne gongen består ensemblet av 2 hardingfeler, 2 viola d´amore, tympanon og gambe. Eg ynskjer å gje stykket ei ganske ope form, slik at musikarane kan få utfolda seg i landskapet dei trivst i. Musikken blir sjølvsagt prega av den særeigne klangen i dei ulike instrumenta, men og av at musikarane har bakgrunn i ulike former for musisering". Repertoaret på denne konserten vil bestå av dette nyskrivne verket av Nils Økland, nyskriven slåttemusikk og tradisjonell slåttemusikk, samt klassisk tidleg musikk av “folkeleg karakter”.
Spelestader:
Bø Museum, Bø i Telemark, 18. November kl 20.00
Riksscenen Oslo, kafe´MIR, 19. November kl 21.00
Kulturhuset Kabuso, Øystese, 20. November kl 20.00
Granvin kyrkje, Granvin, 21. November kl 19.00
Dei medverkande:
Knut Hamre:
er ein av våre aller fremste utøvarar på hardingfele som verkeleg har reindyrka sin tradisjon frå Hardanger, men som også har hatt samarbeid med musikarar innan dei fleste sjangrer. Dette har ført til mange prosjekt og CD-utgjevingar Han har vunnet Landskappleiken heile 7 gonger, vunnet Spellemannspris, hatt Statens Arbeidsstipend og motteke mange prisar. Han har turnert i inn- og utland sidan 1975 og vore med på ei rekkje bestillingsverk.
Benedicte Maurseth:
spelar Hardingfele og Viola d´amore. Maurseth har turnert mykje for Rikskonsertane og spela på ei rekkje festivalar i inn og utland. Sommaren 2007 vart ho gjennom Rikskonsertane kåra til “Årets unge folkemusikar” og har motteke mellom anna Statens Arbeidstipend. Våren 2009 hausta ho særs gode kritikkar for sine nye komposisjonar til sceneversjonen av romanen ”Andvake” skrive av Jon Fosse ved Det Norske Teatret. Er for tida aktuell på NationalTheatret i forestillinga „Nå- med kvinnehånd“ i samarbeid med Anne Marit Jacobsen.
Nils Økland:
spelar Hardingfele og Viola d´amore og er komponist. Som felespelar er han heilt utanom det vanlege og opererar i grenselandet mellom norsk folkemusikk, improvisasjon og moderne musikk. Økland har vore solist med ulike orkester og ensemble I dei fleste europeiske land, og har hatt fleire turnear for Rikskonsertane. Han har urframført verk for solo hardingfele og med orkester I tillegg til at han også komponerar mykje sitt eige konsertrepertoar. Nils Økland har dessutan laga filmmusikk, ballettmusikk og div. bestillingsverk.
Phillipe Pierlot:
kjem frå Belgia og spelar viola da gamba og barryton. Han rekna for å vera ei stjerne innan tidleg musikken på sitt instrument og vert invitert over heile verda til å halda konsertar. Han arbeidar særleg med tidleg musikk men også innan samtidsmusikk. Han er mykje som dirigent og rettleiar i historiske tolkningar av eldre musikk og er professor ved Horchscule for musikk i Tyskland.
Elisabeth Seitz:
spelar Tympanon og kjem i frå Tyskland. Ho arbeidar hovudsakleg med tidleg musikk men også med samtidsmusikk. Ho er mykje nytta som pedagog ved dei fremste universitetene i Tyskland og samarbeidar med ein rekkje ulike ensembler, mellom anna i eigen trio med Økland og Pierlot.