Denne veka er det klart for finalerunda i Luttprisen 2010. Omlag 8000 røyster kom inn i første runde. No skal interesserte røyste fram sjølve vinnaren. Dei sju nominerte er Tyyl!, Johanna Knudsen, Olav Stedje, Sigrid Moldestad, Arne M. Sølvberg, Vreid og Liv Kreken. Moldestad fekk òg Lutt-prisen for 2007.

Det er du som saman med fagjuryen bestemmer kven som skal vinne. Du kan gå til denne sida, finne din favoritt, og røyste. Men du bør ikkje vente for lenge: Avrøystinga blir stengd alt torsdag 25. november klokka ti.

Vinnaren blir gjort kjend under konserten på laurdag. I år er prisen eit stipend på 25.000 kroner frå Sparebanken Vest -  og eit kunstverk av Oddvar Torsheim.

Lokal supergruppe

På laurdagen går Olav Stedje, Sigrid Moldestad, Eva Weel Skram og Håvard Lothe saman og lagar ”superband” frå Sogn og Fjordane. No skal dei  spele kvarandre sin musikk i Operahuset på Nordfjordeid siste helga i november, melder NRK Sogn og Fjordane.

- Dette må vere noko av det største som har skjedd innan lokalmusikken i fylket. Eg gler meg som ein unge til å høyre dei fire spele kvarandre sine godlåtar, seier prosjektleiar for årets Lutt-konsert, Stian Sjursen Takle.

Konserten blir sendt direkte både i radio og nett-tv  laurdag 27. november. Også P1-scenen i NRK P1 kjem til Nordfjordeid, for å ta opp konserten for speling på Noregs største radiokanal.
 

Unge og eldre talent

Den nye stjernekvartetten får mellom anna følge av Odd Erik Lothe frå Fabel , sopranen Synnøve Nordvik og radioartisten Odd frå Årdal med band. Sunnfjordkunstnaren Oddvar Torsheim skal òg framføre ei splitter ny låt.

- Vi har fleire godbitar, og ei flott samling med etablerte og nye unge musikalske talent, seier Stian Sjursen Takle. - Dei unge talenta Vilde Skjerdal, Sigrid Myklebust og Simon Pavelich kan publikum glede seg til å få oppleve på Luttscena for første gong.

Sjølve konserten er alt utseld. Men sendinga går også i opptak på NRK Sogn og Fjordane måndag 29. november mellom klokka 11 og 13.

Her er lista over alle som tidlegare har fått Luttprisen frå NRK Sogn og Fjordane.

  • Luttprisvinnar 2009: Håvard Lothe
  • Luttprisvinnar 2008: Generous Days
  • Luttprisvinnar 2007: Sigrid Moldestad
  • Luttprisvinnar 2006: Eva Weel Skram

 Les meir på samlesida nrk.no/sognogfjordane/lutt/.