Sjå fullstendig resultatliste frå tevlingane onsdag her!

I løpet av dagen har det vore tevla i klassene Durspell solo, Andre instrument solo og Fele/hardingfele solo – alle klassene for seniorar og juniorar. Dei som går vidare til finalespelet onsdag kveld kl. 20.00 i Idrettshallen er:

Durspell solo:

  • Junior: Ingen finalistar.
  • Senior: Sjur Borge, Tom Kjetil Tørstad, Øyvind Sandum og Rikke van Ommeren.

Andre instrument solo:

  • Junior: Ingen finalistar.
  • Senior: Mads Erik Odde, Ronny Kjøsen og Thomas Nilssen.

Fele/hardingfele solo:

  • Junior: Mathilde Skjæret, Henriette Y. Rossebø og Rasmus Kjorstad.
  • Senior: Britt Elise Skram, Einar Olav Larsen, Arne M. Sølvberg og Nina Fjeldet.

Resultatet frå finalespelet og vinnarane i kvar klasse blir gjort offentlege laurdag kl. 18.00.

Høgt nivå
I klassa for Durspell solo, senior deltok 12 spelemenn og –kvinner. Ei av dommarane, Rannveig Djønne (37) seier at nivået er høgt.

- Eg er imponert. Nivået har vore veldig høgt, noko som ikkje gjer dommarjobben enklare – tvert imot. Vi er ganske samstemte i dommarpanelet, men dømminga har likevel vore krevjande.

- Vi har eitt sett med kriterium frå eigaren av arrangementet, FolkOrg. Samstundes må vi vurdere utøvarar som spelar til dømes eigenkomponerte låttar, eller låttar dei har plukka frå andre tradisjonsområde. Det har vore ei utfordring, men ikkje uoverkommeleg: Vi har diskutert undervegs, og diskusjonane har vore gode.

- Korleis har den fyrste tevlingsdagen vore?

- Du, det har vore veldig bra. Påmeldinga har vore gledeleg stor, særleg i seniorklassa for durspell. I juniorklassen var det berre tre deltakarar, diverre. Vi får tru rekrutteringa tek seg opp i åra framover.  

- Arrangementet så langt – kva vil du seia om det?

- Vi blir tekne så godt vare på av arrangørane. All ros til dei!

- Du er ei garva durspelekvinne sjølv. Kva slags utvikling og endring i spelet ser du?

- Juniorane er dyktige i forhold til alderen sin. Mange unge spesialiserer seg og mykje av spelet er gjenomarbeidd, solid og godt.

- Forventingar elles?

- Eg gler meg stort til resten av festivalen. I morgon er det lagspel, det blir spennande. Festen får eg vente med til fredag, fortel ei munter Djønne.

Folkemusikk.no kjem attende med meir informasjon frå Landsfestivalen.