Bli med på Majorstuens slagerparade

Då felespelarane i Majorstuen starta sitt musikalske samarbeid for 10 år sidan, hadde dei eit enkelt mål; dei ønska å utfordre både seg sjølv, instrumenta og den norske folkemusikken. - Majorstuen starta som eit uformelt studentspelemannslag på musikkhøgskulen i Oslo i 2000. I byrjinga var det med både fele, trekkspel og fløyte, men etter kvart etablerte det seg ein fast gjeng med felespelarar. Me blei veldig fasinerte av den feite felelyden som me fekk fram og digga konseptet, og difor held me framleis på!, sa Majorstuen i samband med 10 års-jubileumet og Folkelarm i 2010. Og Majorstuen held framleis fram med sin kreative musikalske leik. - Det har vorte tydelig for oss at me har ulike musikalske ideal, men som Majorstuen finn me ei felles kjerne. Me har eit akustisk ideal, berre strykeinstrument, og me skal utfordre rammene for instrumenta våre, og nytte dette som ei utfordring. Majorstuen sin musikk skal vera spennande både å høyre og å sjå på, seier dei.